ЎПКА САРАТОНИ ДИАГНОСТИКАСИДА ГИСТОЛОГИК ТЕКШИРУВ АҲАМИЯТИ
Abstract
Резюме. Ушбу илмий ишда ўпка саратони ташхиси қўйилган беморларда гистологик текширувларнинг диагностик аҳамияти, ўсма тўқималарининг морфологик хусусиятлари ва патологик жараёнларнинг ривожланиш босқичлари чуқур таҳлил қилинди. Тадқиқот 2024–2025 йиллар давомида Самарқанд вилояти Республика ихтисослаштирилган онкология марказида амалга оширилиб, жами 20 нафар бемор кузатувга жалб этилди. Амалийот жараёнида бронхоскопия ёки торакотомия орқали олинган биопсия намуналарини 10% формалинда фиксация қилиш, гистологик ўтказиш, парафин блоклар тайёрлаш, микротомда 4–5 мкм қалинликдаги кесмалар олиш ва гематоксилин-еозин билан бўяш техникалари бажарилди. Микроскопик таҳлилда ҳужайра морфологияси, ядро атипияси, митотик фаоллик даражаси, стромал ўзгаришлар ва инфильтратив жараёнлар баҳоланди. Натижалар гистологик текширувнинг ўпка саратонини аниқлашда юқори аниқликка эга эканини кўрсатди. Биопсия, фиксация ва бўяш жараёнларининг тўғри бажарилиши диагностик аниқликни 95% гача ошириши аниқланди. Тадқиқот гистологик диагностика ўпка саратонининг эрта босқичларини аниқлаш, метастаз хавфини баҳолаш ва индивидуал даволаш стратегиясини белгилашда энг ишончли усул эканлигини тасдиқлади. Калит сўзлар: ўпка саратони, биопсия, гистологик таҳлил, морфологик ўзгаришлар, иммуногистокимё, микроскопия.