ХАРБИЙ ХИЗМАТГА ЧАҚИРИЛУВЧИЛАРНИ КОМПЛЕКС ТИББИЙ КЎРИК НАТИЖАЛАРИ ВА ХИЗМАТГА ЯРОҚЛИЛИК ТОИФАЛАРИ: КЎПТАРМОҚЛИ КОМИССИЯ ТАЖРИБАСИ (РЕТРОСПЕКТИВ ТАҲЛИЛ).
Аннотация
Ушбу мақолада ҳарбий хизматга чақирилувчиларининг тиббий кўрик натижалари таҳлил қилиниб, кўптармоқли тиббий комиссиялар хулосалари асосида хизматга яроқлилик даражалари ўрганилди. Олинган натижаларга кўра, «чегараланган яроқли» ва «яроқсиз» тоифалар асосан кўз, ЛОР ва стоматологик патологиялар ҳамда руҳий-асаб ва суяк-мушак тизими касалликлари билан боғлиқ экани аниқланди. Рентгенологик топилмалар кўп ҳолларда қўшимча текширув ёки даволанишни талаб этган ҳолда «кечиктириш» қарорларига сабаб бўлди. Мавзунинг долзарблиги шундаки, ёшлар саломатлиги мамлакат мудофаа салоҳиятига тўғридан-тўғри таъсир кўрсатади, профилактик чора-тадбирлар эса хизматга яроқли кадрлар улушини оширишда ҳал қилувчи аҳамиятга эга. Кўриш, ЛОР ва стоматологик касалликларнинг олдини олиш, руҳий соғлиқни баҳолаш ва суяк-мушак тизими бузилишларини эрта коррекция қилиш ёшларнинг хизматга лаёқатини яхшилаш имконини беради.