BANKLAR FAOLIYATI SAMARADORLIGI KO'RSATKICHLARINING NAZARIY ASOSLARI
Litsenziya: cc-by
Annotatsiya
Banklar faoliyati samaradorligi mamlakat moliya tizimining barqaror ishlashida muhim o‘rin tutadi. Tijorat banklari turli vazifalarni bajaradi, o‘zaro va iqtisodiyotning boshqa subyektlari bilan hamkorlik qiladi, ko‘plab operatsiyalarni amalga oshiradi. Banklarning ishlash qobiliyatiga ta’sir ko‘rsatishi, ularni bankrotlik holatiga olib kelishi, bank mijozlari va mulkdorlariga katta zarar yetkazishi mumkin bo‘lgan ko‘plab xatarlar mavjud. Bunday holatlarga yo‘l qo‘ymaslik uchun mahalliy banklar hozirgi vaqtda barcha ehtimoliy xatarlarni baholashni tobora sinchkovlik bilan amalga oshira boshladilar. Yana bir jihat shundaki, bank mijozlari ham o‘z jamg‘armalarini qo‘yishga tayyor bo‘lgan bankni tanlashga mas’uliyatliroq va malakaliroq yondashadilar. Masalan, bank mulkdorlari va aksiyadorlari uchun uning faoliyati samaradorligi to‘langan dividendlar miqdori va tijorat muassasasining bozor qiymati bilan ifodalanadi. Bankning o‘zi uchun esa samaradorlik shundan iboratki, u o‘z faoliyatining chegaralarini potensial ravishda kengaytirishi mumkin. Davlat uchun bu bank industriyasidan byudjetga tushadigan soliqlar hajmi bildiradi.