МЕТАБОЛИК СИНДРОМ ФОНИДАГИ СУРУНКАЛИ ЮРАК ЕТИШМОВЧИЛИГИДА ИНСУЛИН РЕЗИСТЕНТЛИГИ ВА ЯЛЛИҒЛАНИШНИНГ ДИАСТОЛИК ДИСФУНКЦИЯ БИЛАН БОҒЛИҚЛИГИ

Резюме. Мақсад. Метаболик синдром фонида сурункали юрак етишмовчилиги бўлган беморларда инсулин резистентлиги ва тизимли яллиғланишнинг чап қоринча диастолик дисфункцияси ҳамда жисмоний иш қобилияти билан боғлиқлигини аниқлаш. Усуллар. Проспектив кузатув тадқиқотига 40–75 ёшдаги 200 бемор киритилди. Клиник кўрик, антропометрия, артериал босим, биокимёвий текширувлар, HOMA-IR индекси, юқори сезгир Ц-реактив оқсил, интерлейкин-6, NT-proBNP, трансторакал эхокардиография, олти дақиқалик юриш тести ва Миннесота сўровномаси баҳоланди. Иштирокчилар HOMA-IR бўйича тертилларга ажратилди. Гуруҳлараро фарқлар, Спирман корреляцияси, кўп омилли чизиқли ва логистик регрессия қўлланилди. Натижалар. HOMA-IR паст тертилдан юқори тертилга ошганда E/e′ 12,6±2,4 дан 17,0±3,1 гача, интерлейкин-6 7,8 дан 14,2 пг/мл гача кўтарилди; олти дақиқалик юриш масофаси 366±68 дан 267±61 метргача қисқарди (тренд учун p<0,001). HOMA-IR E/e′ билан ижобий (rₛ=0,41), юриш масофаси билан салбий (rₛ=−0,44) боғланди. Тузатилган моделда HOMA-IR (β=0,34; p<0,001), интерлейкин-6 (β=0,23; p=0,002), систолик босим (β=0,16; p=0,018) ва eGFR (β=−0,14; p=0,036) E/e′ нинг мустақил предикторлари бўлди. Хулоса. Инсулин резистентлиги ва паст даражали тизимли яллиғланиш диастолик тўлиш босими ҳамда функционал чекланиш билан мустақил боғлиқ. Ушбу кўрсаткичларни биргаликда баҳолаш юқори хавфли фенотипни эрта аниқлашга ёрдам бериши мумкин. Калит сўзлар: метаболик синдром; сурункали юрак етишмовчилиги; инсулин резистентлиги; HOMA-IR; интерлейкин-6; диастолик дисфункция.

Hali tarjima qilinmagan