ЁШЛАРДА ИШЕМИК ИНСУЛЬТДА NVU АСОСИДА ИНДИВИДУАЛЛАШТИРИЛГАН ИНТЕГРАТИВ ТЕРАПИЯНИНГ КЛИНИК-ФУНКЦИОНАЛ САМАРАДОРЛИГИ

Резюме. Ёшларда ишемик инсультни даволашда NVU концепциясига асосланган индивидуаллаштирилган интегратив терапиянинг клиник-функционал ва лаборатор самарадорлиги баҳоланди. 18–44 ёшли 116 нафар беморда GCS, NIHSS, mRS, Бартел индекси, sE-selectin, Endothelin-1, SOD ва TAC динамикаси ўрганилди. Интегратив терапия қўлланилган беморларда неврологик дефицит камайиши, функционал мустақиллик ошиши, эндотелиал дисфункция ва оксидатив стресс кўрсаткичларининг яхшиланиши стандарт терапияга нисбатан яққолроқ кузатилди. NVU асосидаги ёндашув ёшларда ишемик инсультдан кейинги тикланишни оптималлаштириш ва даволашни индивидуаллаштириш имконини беради. Мақсад. Ёшларда ишемик инсультни даволашда NVU концепцияси асосида ишлаб чиқилган индивидуаллаштирилган интегратив терапиянинг клиник-неврологик, функционал, эндотелиал ва оксидатив стресс кўрсаткичларига таъсирини баҳолаш. Материал ва усуллар. Тадқиқотга 18–44 ёшли ишемик инсульт билан оғриган 116 нафар бемор жалб қилинди. Беморлар клиник давр ва даволаш усулига кўра 1-А, 1-В, 2-А ва 2-В гуруҳларига тақсимланди. 1-А ва 2-А гуруҳларида стандарт даволашга NVU концепциясига асосланган интегратив терапия қўшилди, 1-В ва 2-В гуруҳларида стандарт терапия ўтказилди. Клиник самарадорлик GCS, NIHSS, mRS ва Бартел индекси, лаборатор самарадорлик эса sE-selectin, Endothelin-1, SOD ва TAC кўрсаткичлари динамикаси бўйича баҳоланди. Натижалар. Интегратив терапия гуруҳларида NIHSS бўйича неврологик дефицитнинг камайиши, mRS ва Бартел индекси бўйича функционал ҳолатнинг яхшиланиши кузатилди. Енгил неврологик дефицитли беморларда NIHSS 1-А гуруҳда 3,1±0,2 дан 1,5±0,1 баллга, 2-А гуруҳда 3,6±0,2 дан 1,6±0,1 баллга камайди; стандарт терапия гуруҳларида ушбу кўрсаткичлар мос равишда 2,4±0,2 ва 2,7±0,2 баллни ташкил этди (p<0,05–0,01). Даволашдан кейин интегратив терапия гуруҳларида sE-selectin ва Endothelin-1 даражалари пасайиб, SOD ва TAC кўрсаткичлари ошди (p<0,05). Хулоса. NVU концепциясига асосланган индивидуаллаштирилган интегратив терапия ёшларда ишемик инсультдан кейинги неврологик ва функционал тикланиш, эндотелиал ҳолат ҳамда антиоксидант ҳимоя кўрсаткичларининг ижобий динамикаси билан боғлиқ бўлди. Калит сўзлар: ишемик инсульт, ёш беморлар, Neurovascular Unit, NVU, индивидуаллаштирилган терапия, NIHSS, GCS, Бартел индекси, sE-selectin, Endothelin-1, SOD, TAC.

Hali tarjima qilinmagan