СОМАТОТРОПИНОМА ВА НОФУНКЦИОНАЛ ГИПОФИЗ АДЕНОМАЛАРИДА УЧРАЙДИГАН РЕПРОДУКТИВ БУЗИЛИШЛАРНИНГ КЛИНИК-ГОРМОНАЛ ХУСУСИЯТЛАРИ

Резюме. Гипофиз аденомаларида репродуктив дисфункция гипоталамо-гипофизар-гонадал ўқнинг бузилиши билан боғлиқ бўлиб, аёлларда ҳайз цикли бузилишлари, ановуляция, гипогонадизм ва бепуштлик кўринишида намоён бўлиши мумкин. Соматотропинома ва нофункционал гипофиз аденомаларида репродуктив бузилишларнинг якуний клиник фенотипи ўхшаш бўлса-да, уларнинг шаклланиш механизмлари сезиларли даражада фарқ қилади. Ушбу фарқларни тизимли баҳолаш репродуктив прогнозни аниқлаш ва диагностик ёндашувларни такомиллаштириш учун муҳимдир. Соматотропинома ва нофункционал гипофиз аденомаларида репродуктив бузилишларнинг клиник, гормонал ва радиологик хусусиятларини, уларнинг патогенетик механизмларини ҳамда аденома ҳажми, локализацияси ва инвазивлиги билан боғлиқлигини замонавий илмий адабиётлар асосида тизимли таҳлил қилиш. Ушбу шарҳда соматотропинома ва нофункционал гипофиз аденомаларида репродуктив тизим фаолиятининг бузилишига оид клиник, нейроэндокрин ва радиологик маълумотлар таҳлил қилинди. Асосий эътибор GH/IGF-1 ўқи, пролактин, гонадотроп гормонлар, гипоталамо-гипофизар-гонадал ўқ, тухумдон стероидогенези, фолликулогенез, овуляция ва эндометрий функцияси ўртасидаги патофизиологик боғлиқликларга қаратилди. Шунингдек, МРТ орқали аниқланадиган аденома ҳажми, супраселляр кенгайиши, гипофиз пояси компрессияси ва инвазивлик даражасининг репродуктив дисфункция билан алоқаси баҳоланди. Таҳлил натижалари соматотропиномада репродуктив бузилишлар асосан GH/IGF-1 ўқининг сурункали гиперсекрецияси, инсулин резистентлик, гиперинсулинемия, гиперандроген муҳит ва айрим ҳолларда гиперпролактинемия билан боғлиқлигини кўрсатади. Ушбу ўзгаришлар GnRH пульсацияси, гонадотроп секрецияси, тухумдон стероидогенези, фолликулогенез ва овуляциянинг издан чиқишига олиб келиши мумкин. Нофункционал гипофиз аденомаларида эса репродуктив дисфункциянинг устун механизми аденоманинг нормал гипофиз паренхимасини компрессияси натижасидаги гонадотроп етишмовчилиги ва гипопитуитаризм бўлиб, гипофиз пояси компрессияси билан боғлиқ иккиламчи гиперпролактинемия ушбу жараённи кучайтиради. Ҳар иккала патологияда ҳам GnRH–LH/FSH регуляциясининг бузилиши тухумдон стероидогенези ва овуляциянинг сусайишига, эндометрий рецептивлигининг пасайишига ҳамда фертилликнинг камайишига олиб келувчи умумий патофизиологик занжирни шакллантиради. МРТ кўрсаткичлари, хусусан, аденома ҳажми, супраселляр кенгайиши ва инвазивлиги, айниқса нофункционал макроаденомаларда, гипофизар компрессия ва репродуктив бузилишларнинг оғирлиги билан боғлиқ муҳим структуравий детерминантлар сифатида кўриб чиқилди. Соматотропинома ва нофункционал гипофиз аденомаларида репродуктив дисфункция кўп босқичли нейроэндокрин механизмлар натижасида юзага келади. Соматотропиномада гормонал гиперсекреция ва метаболик дисбаланс устунлик қилса, нофункционал аденомада структуравий компрессия, гонадотроп етишмовчилиги ва иккиламчи гиперпролактинемия асосий механизмларни ташкил этади. Шу билан бирга, ҳар икки патологияда репродуктив бузилишларнинг ривожланишида гипоталамо-гипофизар-гонадал ўқ дисфункцияси умумий патогенетик бўғин ҳисобланади. Репродуктив симптомларни эрта аниқлаш, гипофизар гормонал профилни комплекс баҳолаш ва МРТ кўрсаткичларини клиник маълумотлар билан интеграциялаш репродуктив прогнозни баҳолаш ва индивидуал диагностик-тактик ёндашувни шакллантириш учун муҳимдир. Калит сўзлар: соматотропинома; нофункционал гипофиз аденомаси; репродуктив бузилишлар; гипогонадотроп гипогонадизм; гиперпролактинемия; GH/IGF-1 ўқи; гипоталамо-гипофизар-гонадал ўқ; ановуляция; бепуштлик; магнит-резонанс томография.

Hali tarjima qilinmagan