ЎТКИР ДЕСТРУКТИВ ХОЛЕЦИСТИТДА КЛИНИК-ЛАБОРАТОР ВА УЛЬТРАТОВУШ МЕЗОНЛАРИНИНГ ЖАРРОҲЛИК ТАКТИКАСИНИ ТАНЛАШДАГИ АҲАМИЯТИ

Резюме. Долзарблиги. Ўткир деструктив холециститда кесимни танлаш ўт пуфаги девори деструкциясининг чуқурлигини операциядан олдин баҳолашни талаб этади. Тадқиқот мақсади. Қабул қилингандаги лаборатор ва ультратовуш кўрсаткичларининг морфологик тасдиқланган деструкция шакли билан боғлиқлигини ва уларнинг жарроҳлик тактикасини танлашдаги аҳамиятини баҳолаш. Материал ва усуллар. РШТЁИМ Самарқанд филиалида 2020–2026 йилларда даволанган 278 бемор текширилди. Лаборатор текширув, УТТ, кўрсатма бўйича МСКТ, МРХПГ ва ЭРХПГ, олиб ташланган барча ўт пуфакларининг гистологик текшируви бажарилди; нопараметрик мезонлар ва Коэннинг κ коэффициенти қўлланилди. Натижалар. Гуруҳлар бошланғич лаборатор ва ультратовуш кўрсаткичлари бўйича фарқ қилмади (p>0,05). Флегмоноз шаклдан перфоратив шаклга ўтишда лейкоцитлар 12,9 дан 16,6×10⁹/л гача, СРО 74,3 дан 149,8 мг/л гача, девор қалинлиги 5,5 дан 6,5 мм гача (Краскел–Уоллис, p<0,001), перивезикал суюқлик частотаси 25,5 дан 54,5% гача ортди. Операция пайтидаги ва гистологик хулосалар 94,6% ҳолда мос келди (κ=0,90), номувофиқликлар фақат эмпиемага тегишли бўлиб, 17 бемордан 9 тасида девор гангренаси топилди. Хулосалар. Лейкоцитлар, СРО, девор қалинлиги ва перивезикал суюқлик деструкция чуқурлигини акс эттиради ва кесимни танлаш мезони бўлиб хизмат қилади, билирубин ва холедох диаметри ўт йўлларини текширишга кўрсатмани белгилайди. Калит сўзлар: деструктив холецистит, С-реактив оқсил, ультратовуш текшируви, ўт пуфаги девори қалинлиги, морфологик тасдиқлаш, жарроҳлик тактикаси

Hali tarjima qilinmagan