OʻZBEKISTON TIKUV-TRIKOTAJ SANOATINING RIVOJLANISH HOLATI VA KORXONALARNING IQTISODIY FAOLIYATI TAHLILI
Litsenziya: cc-by
Annotatsiya
Oʻzbekiston tikuv-trikotaj sanoatining zamonaviy rivojlanish holati hamda korxonalarning tashkiliy-iqtisodiy faoliyat koʻrsatkichlari tahlil qilingan. Tadqiqotda toʻqimachilik va kiyim-kechak ishlab chiqarish hajmining dinamikasi, tarmoqning eksport salohiyati, sanoat klasterlarining rivojlanishi, mahalliy xomashyoni chuqur qayta ishlash va tayyor mahsulot ishlab chiqarish jarayonlarining kengayishi yoritilgan. 2020-2025-yillar davomida kiyim-kechak ishlab chiqarish hajmining oʻsish tendensiyalari asosida tarmoqning ishlab chiqarish salohiyati va iqtisodiy faolligidagi oʻzgarishlar baholangan. Korxonalarning tashkiliy-iqtisodiy samaradorligini baholashda ishlab chiqarish hajmi, sotishdan tushgan daromad, tannarx, foyda, rentabellik, mehnat unumdorligi, investitsiyalar, eksport daromadlari va raqamlashtirish darajasi kabi koʻrsatkichlarning ahamiyati asoslangan. Tadqiqot natijalari Oʻzbekiston tikuv-trikotaj sanoatining xomashyo eksportidan yuqori qoʻshilgan qiymatga ega tayyor mahsulot ishlab chiqarish va eksport qilish modeliga bosqichma-bosqich oʻtayotganini koʻrsatadi. Shu bilan birga, ishlab chiqarishni raqamlashtirish, innovatsion texnologiyalarni joriy etish, vertikal integratsiyani rivojlantirish va xalqaro qiymat zanjirlariga faol integratsiyalashish tarmoq korxonalarining raqobatbardoshligini oshirishning muhim omillari sifatida belgilangan.