KERAMIK BUYUMLAR UCHUN Na2O-K2O-Al2O3-B2O3-SiO2 TIZIMI ASOSIDA SIR QOPLAMA TARKIBLARINI ISHLAB CHIQISH
Ochiq kirish: yoʻq
Annotatsiya
Sanoat ishlab chiqarish jarayonlarida hosil bo‘ladigan chiqindilarni samarali utilizatsiya qilish, ularni qayta ishlash va ikkilamchi xomashyo sifatida ishlab chiqarish jarayonlariga qayta jalb etish zamonaviy materialshunoslik va ekologik muhofazaning dolzarb yo‘nalishlaridan biridir. Ayniqsa, mineral va silikat tarkibli sanoat chiqindilarining to‘planishi atrof-muhitga salbiy ta’sir ko‘rsatishi bilan bir qatorda, ularning tarkibida mavjud bo‘lgan foydali komponentlardan foydalanilmay qolishiga olib keladi. Shu sababli chiqindilarni nafaqat utilizatsiya qilish, balki ularning kimyoviy va mineralogik tarkibidan kelib chiqib, texnologik jihatdan qiymatli ikkilamchi xomashyo sifatida qayta baholash muhim ilmiy-amaliy ahamiyat kasb etadi. Bunday istiqbolli chiqindilardan biri tibbiyot ampulalari ishlab chiqarish jarayonida hosil bo‘ladigan shisha chiqindilari hisoblanadi. Ushbu chiqindilar dastlabki xomashyolardan yuqori haroratli eritish jarayoni orqali olingan silikat material bo‘lgani sababli, tarkibida asosan SiO₂, shuningdek Na₂O, CaO, Al₂O₃, MgO va boshqa komponentlar mavjud bo‘lishi mumkin. Mazkur oksidlarning mavjudligi shisha chiqindilariga qayta ishlash jarayonida nisbatan faol xomashyo xususiyatini beradi. Xususan, SiO₂ shishasimon fazaning asosiy strukturaviy komponenti bo‘lsa, ishqoriy va ishqoriy-yer metall oksidlari materialning yumshash va erish haroratiga, suyuq faza hosil bo‘lishiga hamda pishirish jarayonidagi sinterlanish jarayonlariga ta’sir ko‘rsatadi.