INTRODUKSIYA SHAROITIDA KINOA (Chenopodium quinoa Willd.) URUG‘LARINING UNUVCHANLIGIGA HARORAT OMILINING TA’SIRI
Annotatsiya
Ushbu maqolada kinoa (Chenopodium quinoa Willd.) o‘simligi urug‘larining laboratoriya sharoitida turli harorat rejimlarida unuvchanlik xususiyatlari o‘rganildi. Tadqiqotda +10, +15, +20, +25, +30 va +35 °C harorat rejimlaridan foydalanilib, urug‘larning 3, 5, 10, 15, 20, 25 va 30-kunlardagi unish dinamikasi aniqlandi. Tadqiqot natijalari kinoa urug‘larining unuvchanligi harorat omiliga sezilarli darajada bog‘liq ekanligini ko‘rsatdi. Eng yuqori yakuniy unuvchanlik +25 °C haroratda 93,8 ± 1,2 % ni tashkil etdi. Mazkur variantda variatsiya koeffitsiyenti 2,01 % bo‘lib, urug‘larning unish reaksiyasi nisbatan barqaror kechganini ko‘rsatdi. Past haroratlarda urug‘larning unish jarayoni sekinlashgan bo‘lsa, +30 va +35 °C kabi yuqori haroratlarda dastlabki unish tezlashishiga qaramasdan, yakuniy unuvchanlik pasaygan. Olingan natijalar kinoa urug‘larini introduksiya sharoitida yetishtirishda ekish muddatlari va harorat sharoitlarini biologik jihatdan asoslash uchun muhim ahamiyatga ega.