Cichorium intybus L. ildizidan tayyorlangan kofe va choylarning jigar kasalliklarini profilaktikasi va davolashdagi ahamiyati
Annotatsiya
Cichorium intybus L. (sikoriya) murakkabguldoshlar (Asteraceae) oilasiga mansub dorivor o'simlik bo'lib, uning ildizi qadim zamonlardan xalq tabobatida jigar va ovqat hazm qilish tizimi kasalliklarini davolashda qo'llanib kelinadi [1]. Sikoriya ildizidan tayyorlangan kofe va choy tarkibida inulin, fenol birikmalar, flavonoidlar, seskviterpen laktonlar va boshqa biologik faol moddalar mavjud bo'lib, ular antioksidant, yallig'lanishga qarshi va gepatoprotektiv xususiyatlarga ega [2]. So'nggi yillarda olib borilgan eksperimental va klinik tadqiqotlar sikoriya mahsulotlarining jigar hujayralarini oksidlovchi stressdan himoya qilishi, lipid almashinuvini yaxshilashi va gepatotoksik moddalar ta'sirini kamaytirishini ko'rsatgan [3]. Ushbu maqolada Cichorium intybus L. ildizidan tayyorlangan kofe va choylarning jigar kasalliklaridagi terapevtik ahamiyati ilmiy adabiyotlar asosida tahlil qilinadi.