GAZETA RUKNLARI HAQIDA
Annotatsiya
Ommaviy axborotning eng dolzarb, tezkor, hozirjavob va hammabop vositalaridan biri bo‘lgan gazeta nutqi g‘oyaviy-siyosiy, ijtimoiy-iqtisodiy, madaniy-ma’naviy munosabatlarga xizmat qilar ekan, doimo zamon bilan, davr ruhi bilan hamnafas bo‘ladi. Barcha xalqlarni tinchlik uchun, ijtimoiy-iqtisodiy taraqqiyot uchun, xalqlar, mamlakatlar erkinligi, hamdo‘stligi, hamkorligi uchun mehnat qilishga da’vat etadi. Gazetaning bu ijtimoiy vazifasi, birinchi galda, rukn va sarlavhalar orqali amalga oshadi. Nutq vaziyatiga mos tushadigan qisqa shakldagi rukn (rubrika)lar, ixcham sarlavhalar, klishelar, shiorlar va chaqiriqlar, garchi, ular bir qolipdagi tayyor vositalardek tuyulsa-da, faktlarga, narsa-hodisalarga yuqori emotsionallik, tezkorlik, ta’sirchanlik, yuqori publitsistik pafos bilan modal munosabat bildiradi, ochiq ijtimoiy baho beradi. Voqelikka nisbatan ijtimoiy munosabatni aks ettiruvchi dastlabki ifoda vositasi rukn va sarlavhadir.