TEZ AYTISHLARNING MAQOL JANRI BILAN BOG‘LIQLIGI
Annotatsiya
Xalq og‘zaki ijodi namunalari ham barcha san’at asarlari kabi tuzilishi, ijro o‘rni, ko‘rinishi, bajaradigan vazifasi, musiqaga bog‘liqlik darajasi, g‘oyaviy-badiiy xususiyatlariga ko‘ra muayyan tur, guruh va janrlarga bo‘lib qaraladi. Bu xil tur, guruh va janrlarga ajratish, tasniflash nafaqat ijrochilar, balki tinglovchilar, hodisani tadqiq etuvchilar uchun ahamiyatli bo‘lib, folklor namunalarining tabiati, shakllanishi, tadrijiy taraqqiyoti, u yoki bu tur va janrlarning paydo bo‘lishi, mukammal shaklga kelishi, o‘zgarishlarga uchrashi, o‘rin almashinishi va inqirozga yuz tutishi kabi jarayonlarni kuzatish, o‘rganish imkonini beradi. Shu sababli, folklor janrlari bir-biriga bog‘liq holda taraqqiy etadi, sayqallanadi, shuningdek, vaqtlar o‘tishi bilan bir-biriga o‘tishi yoki tabiati jihatidan bir-biriga yaqinlashishi mumkin.