ÚRP-ÁDET, DÁSTÚRLER -RUWXIY MÁDENIYATIMIZ NEGIZLERI
Annotatsiya
В этой статье представлены идеи, которые формируют дружбу и человечность у современной молодёжи. В статье использованы образцы народного устного творчества. Высказывались мнения о национальных ценностях и воспитании предков. В статье приведены жизненные примеры, формирующие необходимые воспитательные качества для воспитания молодёжи. Kirisiw. Xalqımızdıń úrp-ádetleri kóp qırlı mıń sırlı júdá bay mádeniy ǵáziyne. Házirgi ǵárezsizlik sharayatında milliy úrp-ádetlerimizdi úyrenip, izleniwler alıp barıwǵa júdá keń jol ashıp berilgen. Milliy ǵárezsizlik ideyasın qáliplestiriwdiń de tiykarǵı negizleriniń biri bul xalqımızdıń milliy úrp-ádet hám dástúrleri bolıp esaplanadı. «Milliy ǵárezsizlik ideyası tiykarǵı túsinik hám principler» kitabında hám «Milliy ǵárezsizlik ideologiyasınıń milliy, ulıwma adamzatlıq, filosofiyalıq, diniy, huqıqıy, siyasiy sociologiyalıq, jámiyetlik, ekonomikalıq, mádeniy, psixologiyalıq negizlerin, úrp-ádetler dástúrlerdiń, intellektual qádiriyatlardıń ideologiyanı qáliplestiriw hám bayıtıwdaǵı tutqan ornı hám tásirine baǵıshlanǵan ilimiy-izertlew jumısların alıp barıw zárúrligi» atap kórsetiledi. Úrp-ádet, dástúrler insannıń ruwxıy dúnyasın qáliplestiriwde ómirdi túsinip, turmıs tájiriybelerin ózlestiriwde ruwxıy dúnyası bay insan bolıp jetilisiwinde áhmiyetli orın tutadı. Úrp-ádet adamlardıń turmısına sińip ketken, turaqlı túrde qaytalanıp turatuǵın háreket, iskerlikler kópshilik tárepinen qabıl etilgen minez-qulıq qaǵıydaları, kónlikpelerden ibarat bolıp keledi. «Dástúr» sózi úrp-ádetke qaraǵanda keńirek mániske iye bolıp «jetkizip beriw» degen mánisti ańlatadı. Adamlardıń ásirler dawamında toplanǵan túsiniklerin, dún'yaqarasın, bilim hám kónlikpelerin, minez-qulıq qaǵıydaların, tájiriybelerin ulıwmalastırıp kelesi áwladqa tayarlaw, tabıs etiw, jetkeriw máselelerin hám úrp-ádetler dizimin óz ishine aladı. Úrp-ádetler jámiyettiń rawajlanıwı adamlardıń ekonomikalıq, ruwxıy, jámiyetlik-siyasiy turmıs qálpiniń ózgeriwi menen zatlıq hám ruwxıy talaplarǵa say ózgerip, jańalanıp turadı. Al, dástúrler bolsa áwladtan-áwladqa derlik ózgerissiz ótedi. Dástúrler hám úrp-ádetler haqqında gáp ketkende onı «mádeniyat» túsiniginen ajıratıp talqılaw múmkin emes, xalıq dástúrleri mádeniyattıń negizin quraydı. Adam balası óziniń sanası, aqıl tárezisi, mádeniy turmısı menen basqa janzatlardan ajıralıp turar eken, onıń ushın barlıq jaqsı, iygi nárseler ádetke, dástúrge aylanıp bara beredi. Jámiyettiń rawajlanıw barısında mıńlap gezlesetuǵın tariyxıy waqıyalar menen jámiyetlik qubılıslardı úyreniw hám ulıwmalastırıw arqalı hár bir xalıq óz úrp-ádetlerin dóretedi hám ol jámiyetshilik tárepinen quwatlanıp otıradı.