Bozor iqtisodiyoti sharoitida aksiyadorlik jamiyatlari faoliyatining samaradorligi korporativ boshqaruv tizimining qanchalik mukammal tashkil etilganiga bevosita bog'liqdir. Korporativ boshqaruvning asosiy elementlaridan biri dividend siyosati hisoblanib, u kompaniya foydasini taqsimlash, aksiyadorlar manfaatlarini himoya qilish hamda uzoq muddatli rivojlanish strategiyasini belgilashda muhim instrument sifatida namoyon bo'ladi. Zamonaviy kapital bozorlarida investorlar kompaniyaning moliyaviy natijalari bilan bir qatorda dividend to'lovlarining barqarorligi va prognoz qilinuvchanligiga ham katta e'tibor qaratmoqda. Shu sababli dividend siyosatini shakllantirish masalasi nafaqat moliyaviy boshqaruv, balki korporativ boshqaruv tizimining markaziy komponentiga aylanmoqda.